Шымкент қаласының жедел медициналық жәрдем бригадасы Таразда өткен республикалық кәсіби шеберлік чемпионатында І орынға ие болды.
Жарысқа Қазақстанның барлық өңірлерінен келген жедел медициналық жәрдем бригадалары, сондай-ақ Ресей, Беларусь, Өзбекстан, Қырғызстан және басқа мемлекеттердің өкілдері қатысты. Байқауға 165–180 адам жиналды.
Чемпионаттың мақсаты – жедел медициналық жәрдем қызметкерлерінің кәсіби біліктілігін арттыру, төтенше жағдайларда медициналық көмек көрсету дағдыларын жетілдіру, командалық жұмысты дамыту және халықаралық тәжірибе алмасу.
Іс-шара бағдарламасына халықаралық сарапшылардың қатысуымен шеберлік сабақтары, тәжірибе алмасу кездесулері және жедел медициналық көмекті жетілдіруге арналған ғылыми-практикалық іс-шаралар енгізілді.
Шымкент бригадасының жеңісі мамандардың кәсіби дайындығы мен командалық үйлесімділігін көрсетті.
