Шымкентте шағын және орта бизнесті қолдаудың жаңа тетігі енгізілуде. 2026 жылғы 1 қыркүйектен бастап қалада Бизнесті қолдау және сүйемелдеу орталығы жұмысын бастайды. Шымкент жаңа жобаны алғаш болып іске қосатын Қазақстанның бес пилоттық өңірінің қатарына енді.
Жаңа орталық қала кәсіпкерлерінің бизнесті жүргізу барысында кездесетін мәселелерін бір алаңда қарастыруға бағытталған. Оның негізгі міндеті – қиын жағдайға тап болған шағын және орта бизнес субъектілерінің проблемаларын анықтап қана қоймай, оларды нақты шешім қабылданғанға дейін сүйемелдеу.
Бұған дейін Шымкент кәсіпкерлері салық берешегін реттеу, қаржыландыруға қол жеткізу, мемлекеттік қолдау шараларын пайдалану немесе өнім өткізу мәселелері бойынша әр мемлекеттік орган мен ұйымға жеке жүгінуге мәжбүр болатын. Енді кәсіпкерге «Даму» қорының Шымкенттегі өңірлік филиалының алаңына бір рет жүгіну жеткілікті болады.
Орталық мамандары алдымен кәсіпкердің мәселесін диагностикалап, оны шешудің нақты бағытын айқындайды. Мәселенің сипатына байланысты тиісті мемлекеттік органдар, қаржы институттары және салалық мамандар тартылады. Ең бастысы, өтініш басқа мекемеге жолданғаннан кейін жұмыс тоқтамайды – кәсіпкерге мәселе реттелгенге дейін сүйемелдеу көрсетіледі.
Бұл формат Шымкент сияқты кәсіпкерлік белсенділігі жоғары қала үшін ерекше маңызға ие. Қалада өндіріс, сауда, қызмет көрсету және басқа бағыттарда көптеген шағын және орта бизнес субъектілері жұмыс істейді. Сондықтан кәсіпкерлердің мәселелеріне жедел әрекет ететін бірыңғай алаңның болуы бизнестің тұрақты қызметіне оң ықпал ете алады.
Орталық жұмысына Мемлекеттік кірістер комитеті, «Атамекен» Ұлттық кәсіпкерлер палатасы, бірқатар министрліктер мен мемлекеттік құрылымдар, қаржы институттары, «Бәйтерек» холдингі және жергілікті атқарушы органдар қатысады. Бұл Шымкент кәсіпкерлерінің мәселелерін бірнеше ведомствоның қатысуымен кешенді қарастыруға мүмкіндік береді.
Жаңа орталықтың іске қосылуы қаладағы мемлекеттік қолдау жүйесін кәсіпкер үшін барынша түсінікті және қолжетімді етуге бағытталған. Қаржыландыру немесе өнім өткізу мәселесін уақытылы шешу кәсіпорын қызметінің тоқтап қалуына жол бермеуге және бизнестің әрі қарай дамуына жағдай жасауға мүмкіндік береді.
Шымкенттің пилоттық жобаға енгізілуі қаладағы кәсіпкерлікті қолдау инфрақұрылымын одан әрі жетілдіруге мүмкіндік береді. Бірыңғай сүйемелдеу жүйесі тиімді жұмыс істеген жағдайда кәсіпкерлердің уақытын үнемдеп, мемлекеттік органдармен байланысты жеңілдетіп, шағын және орта бизнестің тұрақтылығын арттыруға ықпал етеді.
