Қостанай облысының халқы өңірде өндірілетін электр энергиясынан 4 есе көп электр энергия тұтынады. Сондықтан энергияға тәуелділікті азайту қажет. Мәселен, облыста 2 жел электр станциясы бар. Электр энергетикасы жүйесін қайта құру мақсатында жаңартылатын энергия көздерін ұлғайту жоспарлануда. Бұл туралы ОКҚ алаңында аймақ басшысы Құмар Ақсақалов айтып берді, деп хабарлайды No-comment.kz - Қазақстан Республикасының Президенті жанындағы Орталық коммуникациялар қызметіне сілтеме жасап.
Мәселен, 2025 жылы Бейімбет Майлин ауданында жалпы құны 35,6 млрд теңгені құрайтын күн (22,6 МВт) және газ поршеньді (40 МВт) электр станцияларын салу жоспарлануда. Арқалық қаласы мен Қостанай ауданында қуаты 50 МВ болатын екі жел электр станциясының құрылысы жүргізіліп жатыр.
«Ағымдағы жылдың қазан айында Рудный қаласында жалпы қуаты 1 ГВт болатын 165 жел электр станциясын салу туралы меморандумға қол қойылды. Аталған жобаларды іске асырудың арқасында өз электр энергиясын өндіру 10 есеге (0,12 ГВт - тан 1,27 ГВт-қа дейін) өседі және облыстың толық көлемде қажеттілігін жабады», – деп атап өтті спикер.
