Солтүстік Қазақстан облысы Айыртау ауданының Шалқар ауылында «Ауыл құтқарушылары» ерікті өртке қарсы құралымының жаңа бекеті ашылды. Ол Шалқар, Лобаново, Әлжан және Заря ауылдарының тұрғындарының қауіпсіздігін қамтамасыз етеді. Қызмет көрсету аумағында 2 мыңға жуық адам тұрады, деп хабарлайды No-comment.kz - ҚР Төтенше жағдайлар министрлігіне сілтеме жасап.
Өрт сөндіру бекеті серіктестіктердің бірінің базасында реновациялау форматында ұйымдастырылды. Өрттер мен төтенше жағдайларға жедел ден қою үшін өрт сөндіру автоцистернасы, қажетті өрт-техникалық жабдықтар мен құралдар қарастырылған. Бекеттің жұмысын арнайы даярлықтан өтіп, тиісті сертификаттар алған жүргізуші-өрт сөндірушілер мен ерікті өрт сөндірушілер қамтамасыз етеді. Ғимаратта жеке құрамның қызмет атқаруы мен тұруына қажетті жағдай жасалған. Мұнда диспетчерлік бөлме, ас үй, жатын бөлме, киім ауыстыратын орын, санитарлық торап, душ және жылытылатын гараж бар.
Жаңа өрт сөндіру бекетінің ашылуы ауылдық елді мекендердің өрт қауіпсіздігін арттыруға, оқиғалар туралы хабарламаларға ден қою уақытын қысқартуға және 2 мыңға жуық тұрғынның қауіпсіздігін қамтамасыз етуге мүмкіндік береді.
