ТМД Төтенше жағдайлар жөніндегі мемлекетаралық кеңесінің XXXVIII отырысы Шымкент қаласында аяқталғаннан кейін Қазақстан Республикасының Төтенше жағдайлар министрі Мұрат Мұханов шетелдік әріптестерімен бірге Түркістан қаласына барды, деп хабарлайды No-comment.kz - ҚР Төтенше жағдайлар министрлігіне сілтеме жасап.
Түркістанмен танысу қолөнершілер қалашығынан басталды. Онда шетелдік қонақтарға қазақ халқының дәстүрлі қолөнері, ұлттық бұйымдары мен жергілікті шеберлердің туындылары таныстырылды. Одан кейін қатысушылар ЮНЕСКО-ның Бүкіләлемдік мұралар тізіміне енгізілген ортағасырлық сәулет өнерінің көрнекті ескерткіші – Қожа Ахмет Ясауи кесенесіне барды. Делегация мүшелері кесененің тарихымен және оның Қазақстанның мәдени әрі рухани мұрасындағы маңызымен танысты.
Мәдени бағдарлама «Керуен-сарай» туристік кешенінде жалғасты. Онда шетелдік қонақтар «Алтын Самұрық» ұшатын театрының жұмысымен танысты. Мультимедиялық қойылым қатысушыларға Қазақстанның тарихи және табиғи көрікті жерлеріне виртуалды саяхат жасауға, елдің мәдениеті мен ұлттық дәстүрлерімен танысуға мүмкіндік берді.
Бірлескен ағаш отырғызу ТМД елдерінің құтқару ведомстволары басшыларын біріктірген халықаралық кездесудің символдық қорытындысына айналды. Акцияға қатысу мемлекеттердің қоршаған ортаны қорғауға деген ортақ ұстанымын және кәсіби байланыстарды нығайтуға деген ынтасын көрсетті.
