Түркістан облысында климаттық өзгерістер мен жауын-шашынның азаюы салдарынан қуаңшылық қаупі айқын сезілуде. Ауыл шаруашылығы саласына үлкен қысым түсіретін бұл жағдай мал азығының тапшылығы, шөп қорының азаюы сияқты мәселелерді туындатып отыр. Осыған байланысты облыс әкімінің орынбасары Нұрбол Тұрашбековтің төрағалығымен арнайы жиын өтіп, қуаңшылықтың алдын алу және оны еңсеру жолдары талқыланды.
Жиын барысында Нұрбол Тұрашбеков қуаңшылыққа тек табиғи құбылыс ретінде емес, жүйелі басқару мен нақты іс-қимылды талап ететін мәселе ретінде қарау қажеттігін айтты. Облыс әкімдігі қазіргі жағдайға бейжай қарап отырған жоқ. Мал шаруашылығын тұрақты қамтамасыз ету мақсатында басқа облыстармен арнайы меморандум жасау бойынша келіссөздер жүргізіліп жатыр. Бұл келісімдер аясында Түркістан өңіріне мал азығының тасымалдануы ұйымдастырылмақ.
Облыстағы диірмендер жыл сайын шамамен 215 мың тоннаға жуық кебек өндіреді. Алайда бұл көлем өңірдегі барлық шаруа қожалықтарының қажеттілігін толық қамти алмайды. Осы себепті басқа аймақтардан қосымша азық жеткізу, логистикалық мүмкіндіктерді жан-жақты қарастыру тапсырылды. Облыс әкімінің орынбасары тасымал мәселесінде уақыт жоғалтпай, тиімді және икемді жүйе құру қажеттігін ескертті.
Нұрбол Тұрашбековтің айтуынша, әрбір ауданның нақты сұранысы мен мүмкіндігі есепке алынуы тиіс. Қазіргі жағдайда ең басты мақсат — қазан айына дейін барлық аудандарда малдың қыстық азығын толық дайындау. Осы бағытта аудан әкімдіктерімен тығыз қарым-қатынаста жұмыс жүргізіліп, әр өңір үшін жеке жоспар әзірленуі қажет. Ауылдық округтер мен шаруашылықтардан нақты деректер жинақталып, қажетті көлемдер нақтыланатын болады.
Жиналыс барысында ауыл шаруашылығы, табиғи ресурстар, көлік және логистика салаларына жауапты басқармаларға нақты тапсырмалар жүктелді. Әр басқарма өз құзыреті шегінде нақты жұмыс жүргізіп, белгіленген мерзімде нәтижесін көрсетуі тиіс. Қуаңшылыққа қарсы шаралар кешенді түрде жүзеге асырылып, әрбір қадам әкімдік тарапынан бақыланатын болады.
Нұрбол Тұрашбеков жауапты тұлғаларға тек формальді есеппен шектелмей, нақты нәтижеге жұмыс істеуді тапсырды. Шаруаларға түсіндіру жұмыстарын күшейту, қажет болған жағдайда гуманитарлық көмек ұйымдастыру, шөп дайындайтын техникаларды тиімді пайдалану — басым бағыттар қатарында. Сонымен қатар, ауыл тұрғындарының жағдайын ескере отырып, әлеуметтік қолдау тетіктерін де қарастыру қажеттігі айтылды.
Осылайша, Түркістан облысы әкімдігі қуаңшылық салдарынан туындайтын қиындықтардың алдын алуға кешенді дайындық жүргізіп, нақты жоспарлармен әрекет етуді бастап кетті.
