Бразилия ұлттық құрамасының шабуылшысы Неймар 2022 жылы Қатарда өтетін футболдан әлем чемпионатына іріктеу ойындарында Перу құрамасына қарсы ойнап, хет-трик жасады. Іріктеудің бірінші турында Боливия құрамасын 5-0 есебімен жеңген бразилиялықтар екінші турда 4-2 есебімен Перуден басым түсті. Перу қақпасына кірген 4 голдың үшеуін Неймар салып, матчтың үздік ойыншысы атанды.
ПСЖ клубының лидері – шабуылшысы Неймардың Бразилия ұлттық құрамасы үшін салған голдарының саны 64-ке жетті. Неймар бұл көрсеткіш бойынша атақты бразилиялық ойыншы Роналдоны (62 гол) басып озды.
Ұлттық құрама тарихындағы ең үздік сұрмерген – Пеле. Оның еншісінде 77 гол бар.
Неймар – 2010 жылдан бастап Бразилия ұлттық құрамасының ойыншысы. Ол 10 жылдың ішінде 103 матч өткізді. 64 голдың 42-сін жолдастық кездесуде, 22-сін ресми матчтарда салған.
