Әз Наурыздың Жайлау күні табиғат анаға қамқорлық танытумен ерекшеленеді. Бүгін шымкенттіктер қоршаған ортаға, табиғатқа көңіл бөліп, түрлі іс-шаралар ұйымдастыруда. Тұрғындар көшелер мен аулаларды тазартып, көшеттер, гүлдер отырғызып, қаланы көріктендіруге атсалысуда.
Арбат алаңында қалалық білім басқармасы мен мемлекеттік зоологиялық саябағы қызметкерлерінің ұйымдастыруымен көрме ұйымдастырылды. Табиғатты аялауға шақыратын игі шарада көпшілік жергілікті білім ұйымдарының оқушылары дайындаған 1000 ға жуық құс ұялары мен ерекше құстарды тамашалады. Іс шара аясында ұйымдастырылған мерекелік ойындарға қатысқан белсенді тұрғындарға сыйлықтар таратылды.
Табиғатқа жанашырлық бір күнмен шектелмейді. Игі бастамалар ертең дендросаябақта жалғасады. Еріктілер ұяларды орнатып, табиғат көркі -құстарға қамқорлық көрсетеді.
Наурыз мейрамы — ежелгі заманнан қалыптасқан жыл бастау мейрамы. Қазіргі күнтізбе бойынша (наурыздың 22) күн мен түннің теңесуі кезіне келеді. Көне парсы тілінде нава=жаңа + рәзаңһ=күн, «жаңа күн» мағынасында, қазіргі парсы тілінде де сол мағынамен қалған (но=жаңа + роуз=күн; мағынасы «жаңа күн»), яғни «жаңа жылды» (күн өсуін белгілеуі) білдіреді.
2010 жылдың 10 мамырынан бастап Біріккен Ұлттар Ұйымының Бас ассамблеясының 64-қарарына сәйкес 21 наурыз "Халықаралық Наурыз күні" болып аталып келеді. Бас ассамблея өзінің берген түсініктемесінде "Наурызды көктем мерекесі ретінде 3000 жылдан бері Балқан түбегінде, Қара теңіз аймағында, Кавказда, Орта Азияда және Таяу Шығыста 300 миллион адам тойлап келе жатқандығын" мәлімдеді. Ал UNESCO болса, 2009 жылдың 30 қыркүйегінде Наурыз мейрамын адамзаттың материалдық емес мәдени мұра тізіміне кіргізді.
Қазақстанда Наурыз мейрамы үш күн: 21-23 наурыз аралығында аталып өтіледі (2010 жылдан бастап). Жалпы, Наурыз парсы, кавказ және түрік секілді халықтардың арасында көктем мейрамы және жаңа жылдың басталуы ретінде тойланады. Ол Иранда 21 наурызда, ал Орталық Азия елдерінде және Әзірбайжанда, мемлекеттік мереке ретінде Тәжікстанда және Қазақстанда - 22 наурызда, Өзбекстан мен Түркияда 21 наурыз күні аталып өтіледі.
ЖАЙЛАУ КҮНІНДЕ ОҚУШЫЛАР 1000-ҒА ЖУЫҚ ҚҰС ҰЯСЫН ДАЙЫНДАДЫ
