ҚР Премьер-министрі Асқар Мамин 27 қарашада «Қазақстан Республикасының Мемлекеттік Туын, Мемлекеттік Елтаңбасын және олардың бейнелерін, сондай-ақ Қазақстан Республикасы Мемлекеттік Гимнінің мәтінін пайдалану (орнату, орналастыру) қағидаларын бекіту туралы» Қазақстан Республикасы Үкіметінің 2007 жылғы 2 қазандағы қаулысына мемлекеттік туды ғимараттардың қасбеттеріне ілуге рұқсат беретін түзетулерге қол қойды.
Қаулыға сәйкес, ережеде 4-тармақтың бірінші абзацы мынадай редакцияда жазылған:
«Қазақстан Республикасының Мемлекеттік Туын жеке және заңды тұлғалар ғимараттарда (тұрғын үйлер мен тұрғын емес үй-жайларда), оның ішінде балкондарда және салтанатты іс-шаралар өткізілетін орындарда патриоттық сезімдерін, қазақстандық бірегейлік идеясын білдіру, елдің, оның азаматтарының жетістіктерін қолдау мақсатында пайдалануы (орнатуы, орналастыруы) мүмкін».
Еске салайық, бұған дейін Қазақстан Президенті Қасым-Жомарт Тоқаев Мемлекеттік рәміздерді, атап айтқанда, туларды пайдалану ережелерін қайта қарауды ұсынған болатын.
