Бүгін Үкімет отырысында Премьер-министр Асқар Мамин «Самұрық-Қазына» ҰӘҚ» АҚ басқарма төрағасы Ахметжан Есімовті 70 жасқа толуымен құттықтады. Ең алдымен, барша қазақстандықты Тәуелсіздік күнімен құттықтаған Премьер-министр Ахметжан Есімовтің айтулы мерейтойы екенін де ұмытпады.
«Ахметжан Смағұлұлы – тәжірибелі басшы, Үкіметте, өңірлерде, «ЭКСПО» компаниясында басшылық қызметтерде жұмыс істеп, аса маңызды «ЭКСПО» көрмесін табысты ұйымдастырды. Ауыл шаруашылығын дамытудың негізін қалады, қазір «Самұрық-Қазына» қорын басқарып, еліміздің дамуына үлкен үлес қосуда. Елбасы мен президент қойған тапсырмалар мен міндеттерді тиімді орындап, нақты жұмысты ұйымдастырып келеді», – деді Мамин.
Үкімет басшысының құттықтауына алғысын айтқан «Самұрық-Қазына» басшысы Асқар Маминді Тәуелсіздік күні қарсаңында «Тұңғыш президент – Елбасы Нұрсұлтан Назарбаев» орденімен марапатталуымен құттықтады.
«Мен Үкіметке алғаш рет 26 жыл бұрын вице-премьер болып келген едім. Сол уақыттан бері алғаш рет Премьер-министрді Тәуелсіздік күні қарсаңында марапаттап отыр. Елбасы кеше сізге үлкен награда тапсырды. Ол осы отырған әріптестеріңіз бен өз еңбегіңіздің бағасы», – деді Есімов.
Айта кетейік, Ахметжан Есімов 1950 жылы 15 желтоқсанда Алматы облысында туған.
