«Металлург» стадионын қайта қалпына келтіру жұмыстары қызу жүруде. Бүгін Парламент Мәжілісінің қос депутаты атап айтқанда, Мұхтар Ерман пен Берік Бекжанов аталған нысанға бет алып, ауқымды құрылыстың барысын бақылады, деп хабарлайды Nur Otan партиясының Шымкент қалалық филиалына сілтеме жасаған No-comment.kz
Қаланың әлеуметтік-экономикалық дамуында стратегиялық маңызға ие нысан басындағы құрылысты аралауға «Nur Otan» партиясы Шымкент қалалық филиалы төрағасының орынбасары Мұратәлі Қалмұратов пен Абай аудандық партия филиалы төрағасының бірінші орынбасары Есемхан Бертаевта барды.
Айта кетейік дәл осы «Металлург» стадионының ел игілігіне дер кезінде берілуі Nur Otan партиясы Шымкент қалалық филиалы әзірлеген сайлауалды бағдарлама бойынша басым бағыттар жазылған Жол картасында орындалуы тиіс басты міндеттердің бірі болып табылады
Кешендегі құрылыс жұмыстары былтыр мамыр айында қолға алынған. Мердігер мекеме «Югстройсервис-Н» жауапкершілігі шектеулі серіктестігі. Серіктестік директоры Арман Бекенов «Металлург» стадионының реконструкциялау жұмыстары ағымдағы жылдың желтоқсан айында аяқталатынын айтты.
Стадионды қайта қалпына келтіру үшін бюджеттен 3,1 млрд теңге қаржы бөлінген. Өз кезегінде халық қалаулылары бас мердігерге құрылыстың сапасына аса мән беріп, нысанның уақытылы қолданысқа берілуі қажет екендігін ескертті.
