«Қызылжар -2», «Ақжайық», «Тұран», «Азат» және «Құрсай» шағын аудандарындағы 13 мыңға жуық халық сапалы электр энергиясына қосылды. «Ақжар» қосалқы станциясы пайдалануға берілді. Өңірдегі электр энергиясы тапшылығын азайту мақсатында «Қазығұрт» қосалқы станциясының қуаттылығын ұлғайтып, 40 мыңға жуық тұрғын мен өндіріс орындарын үздіксіз электр энергиясымен қамтуға мүмкіндік берілді.
«Жұлдыз, Жалын, Қарабастау, Достық, Алтынтөбе сынды шағын аудандарында 25 мыңға жуық халық табиғи газбен қамтылды. Газ жүйелеріндегі ақауларды анықтайтын «Pergam» жылжымалы қондырғысы алынып, диагностика жүргізілген 107 шақырым құбырлардан анықталған 67 ақау жойылды. Нәтижесінде қала тұрғындарының 99,9%-ы ауыз сумен, 100 %-ы электр энергиясымен, 98 %-ы табиғи газбен қамтылды», – деді спикер.
Дегенмен, өңірге инвестиция тарту үшін инженерлік желілердің қуаттылығын арттыру қажет. Ол үшін «Қызылсу» қосалқы станциясын салу жоспарда бар. 6 қосалқы станция және 3 газ тарату станциясын салу қолға алынды.
Жылумен қамтуда пилоттық жоба ретінде акустикалық резонанс әдісіндегі жасанды интеллект арқылы роботтық кешенді қолдана отырып, жылу құбырларына диагностика жүргізілді. Ол құбырларды дәлдікпен сканерлеу арқылы қауіпті учаскелерді анықтап, жөндеу шығындарын 75%-ға дейін үнемдеуге мүмкіндік береді.
Қала қауіпсіздігін қамтамасыз ету үшін түнгі жарықтандыру мәселесі де өзекті болып тұр. 2023 жылға дейін жыл сайын 9714 көшенің 115 көшесі жарықтандырылды. Соңғы екі жылда осы бағыттағы жұмыстар 40 есе ұлғайтылып, 4686 көше жарықтандырылды. Жыл соңына дейін бұл көрсеткіш 100%-ға дейін жеткізілмек.
Былтыр қалада 270 шақырым жолға асфальт төселсе, биыл мыңнан астам шақырым жолға асфальт салу жоспарланған. «А-2» айналма жолының негізгі бөліктері қайта құрудан өтіп, транзиттік көліктерге жағдай жасалады. Қонаев даңғылының жалғасы келер жылы толық аяқталады. Сондай-ақ 2 теміржол өткелі салынбақ.
Жергілікті әуежайдың жаңа ұшу-қону жолағын салу жұмыстары басталды. Бұл жолақ қаланың логистикалық әлеуетін арттырып, өңірлік хаб ретінде дамуына серпін береді.
Биыл Шымкентте 1 млн 375 мың шаршы метр тұрғын үйді пайдалануға беру көзделген. Оның 982 мың шаршы метрі берілді. Дегенмен халық саны ұлғайғандықтан, қазір тұрғын үй кезегінде 90 мыңнан астам халық тұр. Биыл 3808 пәтерлі 61 әлеуметтік тұрғын үй құрылысы жүріп, жыл соңына дейін 2574 пәтерлі 34 тұрғын үй пайдалануға беріледі. Әлеуметтік осал топтарға 1523 пәтер сатып алынды.
