Шымкентте халықаралық экономикалық байланыстарды кеңейту және жергілікті кәсіпкерлер үшін жаңа серіктестік мүмкіндіктерін қалыптастыруға бағытталған Қазақстан-Венгрия бизнес-форумы өтті. Іскерлік алаң екі елдің мемлекеттік құрылымдары, даму институттары мен бизнес өкілдерін біріктірді.
Форумға Шымкент қаласы әкімінің бірінші орынбасары Айдын Кәрімов, Венгрияның Алматы қаласындағы Бас консулы Саболч Сёке Карой, дипломатиялық өкілдік мүшелері, қала әкімдігі, даму институттары мен Кәсіпкерлер палатасының өкілдері, сондай-ақ қазақстандық және венгриялық компаниялардың басшылары қатысты.
Кездесу барысында венгриялық бизнес өкілдеріне Шымкенттің инвестициялық және өнеркәсіптік мүмкіндіктері таныстырылды. Сонымен қатар кәсіпкерлерді қолдаудың қолданыстағы тетіктері мен екі тарап үшін перспективалы ынтымақтастық бағыттары қарастырылды.
Негізгі назар агроөнеркәсіптік кешен, өнімді терең өңдеу, өндірістік кооперация және жаңа өндірістерді жергіліктендіру мәселелеріне аударылды. Бұл бағыттар Шымкент үшін дайын өнім өндірісін арттыру және жергілікті кәсіпорындарды халықаралық өндірістік байланыстарға тарту тұрғысынан маңызды.
Форумның практикалық бөлігінің бірі B2B кездесулер болды. Қазақстандық және венгриялық кәсіпкерлер инвестициялық ұсыныстарды тікелей талқылап, жабдықтар мен өнімдерді жеткізу, технологиялық ынтымақтастық және бірлескен кәсіпорындар құру мүмкіндіктерін қарастырды. Мұндай формат жалпы ынтымақтастық туралы келіссөздерді нақты бизнес байланыстарға айналдыруға мүмкіндік береді.
Венгрия делегациясының Шымкенттегі бірқатар өндіріс орындарын аралауы да форумның практикалық маңызын арттырды. Шетелдік компаниялар жергілікті кәсіпорындардың өндірістік мүмкіндіктерімен және қаладағы өнеркәсіптік инфрақұрылыммен тікелей танысты. Бұл болашақ серіктестер үшін Шымкенттегі нақты өндірістік жағдайды бағалауға мүмкіндік береді.
Халықаралық бизнес-форумдардың жергілікті кәсіпкерлер үшін тағы бір артықшылығы – жаңа өткізу нарықтарына шығу мүмкіндігі. Шетелдік серіктестермен тікелей байланыс орнату арқылы кәсіпорындар өз өнімдерін таныстырып қана қоймай, жаңа технологиялар мен өндірістік тәжірибені енгізу мүмкіндігін де қарастыра алады.
Қазақстан-Венгрия бизнес-форумы Шымкенттің халықаралық іскерлік байланыстарын кеңейтетін кезекті алаң болды. Осындай кездесулердің нәтижелілігі алдағы уақытта нақты инвестициялық және өндірістік жобалардың қалыптасуымен өлшенбек. Ал жергілікті бизнес үшін бұл жаңа серіктестер табуға, өндірістік кооперацияны кеңейтуге және сыртқы нарықтармен байланысты нығайтуға мүмкіндік береді.
