Шымкентте кәсіпкерлердің күнделікті жұмысын цифрландыру, сауда процестерін оңтайландыру және бизнесті басқарудың заманауи құралдарын енгізу мәселелері талқыланды. Қалалық Кәсіпкерлер палатасында BusinessGO цифрлық платформасына арналған кездесу өтіп, оған компаниялар мен дистрибьюторлық желілердің өкілдері қатысты.
Жиынға «Атамекен» ҰКП Басқарма мүшесі – Аппарат басшысы Нұрбек Нәлқожа арнайы қатысып, жобаның негізгі міндеттері мен бизнес үшін практикалық мүмкіндіктері туралы айтып берді. Кездесу барысында платформаның жұмыс істеу тетіктері таныстырылып, оны кәсіпкерлік қызметте пайдалану бағыттары қарастырылды.
BusinessGO – бизнестің нақты қажеттіліктерін ескере отырып әзірленген цифрлық экожүйе. Платформа онлайн-касса, тауарлық есеп, маркетингтік құралдар, аналитикалық сервистер және басқа да цифрлық қызметтерді бір жүйеге біріктіреді. Бұл кәсіпкерлерге бірнеше бөлек сервисті пайдаланудың орнына негізгі бизнес-процестерді бір ортада басқаруға мүмкіндік береді.
Шымкенттегі кездесуде әсіресе дистрибьюторлар мен бөлшек сауда нүктелері арасындағы байланысты ұйымдастыруға назар аударылды. Тауар қозғалысын бақылау, саудадағы ақпарат алмасуды жеделдету және нарыққа қажетті сервистерді бір жүйеге енгізу бизнес үшін операциялық процестерді жеңілдетуге мүмкіндік бере алады.
Кездесудің ашық диалог форматында өтуі кәсіпкерлерге өз қажеттіліктерін тікелей жеткізуге жағдай жасады. Бизнес өкілдері платформаның интеграциялық мүмкіндіктеріне қатысты сұрақтар қойып, мамандардан жауап алды. Сонымен бірге BusinessGO-ны одан әрі жетілдіруге қатысты ұсыныстар айтылды.
Жиында кәсіпкерлерді қаржылай қолдау мәселесі де қамтылды. «Даму» қорының Шымкент қаласы бойынша филиалының директоры Әсет Тлемисов «Іскер аймақ» бірыңғай бағдарламасының мүмкіндіктерін түсіндірді. Бағдарлама микро және шағын бизнесті субсидиялау мен кәсіпкерлік жобаларды ауқымды дамытуға бағытталған.
Шымкент кәсіпкерлері үшін цифрлық және қаржылық қолдау құралдарының қатар дамуы маңызды. Қаржыландыру бизнеске өсуге мүмкіндік берсе, BusinessGO секілді платформалар кәсіпорын ішіндегі процестерді тиімді ұйымдастыруға көмектеседі. Осындай құралдарды қолжетімді ету Шымкенттегі шағын және орта бизнестің цифрлық трансформациясын жеделдетіп, оның бәсекеге қабілеттілігін арттыруға жағдай қалыптастырады.
