Алматы қаласында заманауи технологияларды күнделікті өмірге енгізу бағытында жаңа бастама жүзеге асырылуда. Мегаполистің Самал ауданында тапсырыстарды өздігінен жеткізетін автономды роботтар қызмет көрсете бастады. Бұл жаңашылдық қалалық логистика саласын цифрландырудың маңызды қадамдарының бірі саналады.
Жеткізуші роботтар адамның тікелей басқаруынсыз қозғалып, қажетті бағытты дербес анықтай алады. Олардың жұмысында жасанды интеллект алгоритмдері, камералар, лидарлар, ультрадыбыстық датчиктер және 3D-карталар пайдаланылады.
Осындай технологиялық жабдықтардың көмегімен роботтар айналасындағы жағдайды талдап, жолдағы кедергілерді анықтайды. Жаяу жүргіншілерге басымдық беріп, қажет болған жағдайда қозғалысын тоқтатады. Бұл олардың қалалық ортада қауіпсіз жұмыс істеуіне мүмкіндік береді.
Тапсырыс белгіленген мекенжайға жеткізілгеннен кейін роботтың жүк салатын бөлігі смартфон арқылы ашылады. Жеткізу уақыты орта есеппен 15–30 минутты құрайды.
Алматы Қазақстанда Астанадан кейін автономды жеткізу технологиясы енгізілген екінші қала атанды. Қазіргі уақытта роботтар Самал ауданындағы шектеулі аумақта ғана қызмет көрсетуде.
Алғашқы апталардағы жұмыс нәтижелері талданып, технологияның тиімділігі бағаланады. Соның негізінде жеткізу аймағын кеңейту мүмкіндігі қарастырылады.
Мұндай инновациялық шешімдер қалалық қызмет көрсету жүйесін жетілдіруге, тұрғындардың уақытын үнемдеуге және цифрлық технологиялардың қолданыс аясын кеңейтуге ықпал етеді. Роботтандырылған жеткізу қызметінің дамуы Алматының технологиялық жаңғыруына жаңа мүмкіндіктер ашады.
Алматыда жасанды интеллектпен басқарылатын жеткізуші роботтар жұмыс істей бастады
